Основна дејност на работилницата е рачна изработка на хартија и производи од истата. Истовремено има и туристички карактер, односно на посетителите им ја презентираме постапката на рачна изработка на хартија и начинот на првото печатење на Гутенберговата преса.

Се повеќе прераснуваме во значаен културен субјект не само во Охрид , туку и пошироко (надвор од Републиката) и вистинско туристичко доживување.

Во периодот од нашето отпочнување со работа, не имаат посетено гости од целиот свет и сите се воодушевени од она што ќе го видат и што им го презентираме на самото место.

Традицијата на изработка на хартија во Македонија започнува во втората половина на 16 век во манастирот Свети Наум. Хартијата се изработувала за интерни потреби и во ограничени количини. Националната работилница за рачна изработка на хартија “Св.Климент Охридски” ја возобновува оваа традиција.. Значи на одреден начин преставува продолжеток на старата средновековна постапка,која води потекло од Кина од 2 век п.н.е.

Работилница започна со работа на 23.10.2002 год. Сместена е во прекрасен амбиент во старото градско јадро, 50 метри од музејот- Куќата на Робевци, пред вила Св. Софија. Посебна чест ни преставува тоа што работилницата ја отвори лично покојниот Председател на Република Македонија г-динот Борис Трајковски, кој го доби првиот изработен и отпечатен лист со портретот на Александар Македонски.